مساء الخير ياأصدقاء
بعضكم تابعني عالسناب و تابع معي تفاصيل التجديد

makeover

لمغاسل الضيوف و الساعة القديمة
هالتدوينة خصصتها لشرح طريقة طلاء الخشب اللي اعتمدتها نزولا عند طلبكم

بداية وقبل ما ابدأ حابه أوضح كم نقطة:
– الطريقة اللي راح أشرحها مش الوحيدة ، فيه أكثر من طريقة لطلاء الخشب وأكثر من نوع من الطلاء.
– الخشب اللي أتكلم عنه هو الخشب الطبيعي اللي مايغطيه اي طبقه او معالجه ، وهذا مثال عليه

راح أشرح لكم كيف حولت هالمغاسل من شكلها القديم المتضرر من الماء وكثرة الإستخدام الى الشكل الجديد هذا

وكيف تحولت هالساعه القديمة المليانه خدوش الى هالساعه الفخمه الجديده

أولاً الأدوات اللي نحتاجها هي:

– طلاء للخشب:

لما بحثت لقيت كذا نوع ، الزيتي والبلاستيك و الستيم وغيرهم ، لكن لأني أبغى تغطية كامله ، أو مثل مانسميه في عالم التجميل full coverage إخترت الطلاء الزيتي ، إذا حابه بس تجددين القطعه بدون ماتغيرين لونها أو تخفين معالم الخشبه أنصحك بالستيم steam
الطلاء الزيتي اللي إخترته كان  نص لمعه

semi glass

، لاحظت ان النص لمعه أفضل خيار للحصول على نتيجه تعطيك إحساس القطعه الجديدة . ب٧٠ ريال.

– برايمر أو أساس:

وهو مهم جدا خصوصا لو كان عندك معالم وخطوط واضحه للخشب، وظيفته نفس وظيفة البرايمر اللي نستخدمه في المكياج ( شوي قمت أشك إن اللي أخترع المكياج ماهو إلا دهان^^”)
البرايمر اللي إستخدمته  ب١٠٠ ريال ماكان عندهم الا هالحجم

–  تنر بارد:

التنر وظيفته زي وظيفة الماء بالنسبة للألوان المائية ، نستخدمة لتخفيف الطلاء الزيتي و نحتاجه لتنظيف الفرشاة بعد مانخلص، اللي فهمته إنك لو أخترتي الطلاء البلاستيك بتحتاجين الماء وليس التنر . تلاقونه عند محلات مواد البناء ب ٨ ريال العلبه

– فرش للطلاء:

الفرشاة اللي إستخدمتها شعرها لين، فيه أنواع ثانيه شعرها قاسي ويابس جدا، فضروري إذا بتستخدمون طلاء زيتي لازم الفرشاه يكون شعرها طبيعي او يكون لين يعني ينحني في الحركه مايظل واقف . إذا إشتريتو الأدوات من نفس المحل راح يعطونكم الفرش المناسبه مع الطلاء المناسب.
إخترت هالنوع لأني راح أطلي مساحات صغيره + فيها زوايا ومناطق محفوره . لكن لما يكون عندكم شي كبير تصبغونه زي الأبواب مثلا أنصحكم تستخدمون الرول أسهل

– أدوات حمايه:

قفازات و سفره او بلاستيك رول ومناديل ورقيه
– شريط لاصق: إستخدمت النوع الورقي ، مدري وشمعني هذا بس دايما أشوفهم يستخدمونه

– مقص ومشرط

– مفكات بأحجام مختلفة

– ورق سنفرة :

لتمليس وتهذيب وتجهيز سطح الخشب . ماتحتاجون شي خشن مرة ، هالنوع يكفي

– معجون خشب:

ماإحتجته كثير بس مهم جدا اذا كانت قطعة الخشب مشروخه او محفوره

– خرقه أو فوطه للمسح

طبعاً كل هالأدوات غير مكلفة أبداً ومعظمها متوفر في المنزل ، و الباقي ماكلفني الا شي بسيط جداً.

طريقة طلاء الخشب:

١- في البداية يجب معاينة الخشب بدقة وإستكشاف المشاكل والأضرار التي حلت به مع مرور الزمن إذا كانت عملية تجديد للطلاء. الخدوش الكبيره والحفر يجب حشوها جيداً بمعجون الخشب . لاتشيلون هم إذا كان المعجون مش متساوي لأننا بنرتب شكله بالصنفره لاحقاً. المهم هو تعبئة الفراغات و إصلاح أي كسور موجوده، اتركو المعجون يجف لمدة ٢٤ ساعة .

٢- السنفرة: إذا كان سطح الخشب املس وقليل النتؤات مثل الخشب اللي طليته بتكفيكم السنفره الناعمة زي اللي في الصورة، تتم السنفرة بشكل دائري على كامل الخشب والتركيز عالمناطق الغير متساويه مع السطح مثل المحشوه بالمعجون . الهدف تهيئة السطح للدهان.

٣- بالخرقة المبلله نمسح الخشب لإزالة كل الغبار الناتج عن السنفرة . بتلاحظون ان الخشب صار املس اكثر.

٤- بالتيب أو الشريط اللاصق نبدأ نهيء المكان للطلاء، لزقو على كل الاماكل اللي ماتبون الطلاء يوصلها ، وخلوكم دقيقين جدا في هذي العمليه لان اي غلطه ممكن تجيب لكم العيدXD ممكن تستخدمون الرول البلاستيك لتغطية الارضية اللي بتشتغلون عليها او اي مكان تبون تحمونه.
٥- ضروري تكون العملية داخل مش في الخارج تجنباً للغبار او اي شي ممكن يطيح عالخشب بفعل الرياح.

٦- طبقة البرايمر، بإستخدام الفرشاه اللي اخترتوها ضعو طبقة من البرايمر على الخشب وادهنوها بشكل متوازي مع خطوط الخشب ، حركة الفرشاه في الدهن مهمه يجب ان يكون اتجاهها نفس اتجاه الخشب، ادهنو جميع المناطق اللي راح تطلونه وتأكدو من توزيع البرايمر بشكل جيد. يترك البرايمر ٦ ساعات ليجف تماماً.

٧- طبقة الطلاء١: ضعوا في وعاء الطلاء ٩٠٪‏ طلاء و ١٠٪‏ تنر ، التنر يساهم في تخفيف الطلاء قليلاً ليسهل الدهن. بالفرشاه ادهنو طبقه من الطلاء على الخشب المطلي بالبرايمر ، ومثل ماقلت لكم اتبعو اتجاه الخشب اثناء الدهن. يترك الطلاء لمدة يوم كامل ليجف او ١٢ ساعه كحد أدنى.

٨- طبقة الطلاء٢: نكرر نفس العمليه السابقة فوق الطبقه الاولى من الطلاء ونتركه ليجف يوم كامل.

٩- في حال ماوصلتو لدرجة اللون المطلوب بإمكانكم تكرار الطبقات او بأمكانكم الاكتفاء بطبقه او اثنتين من الطلاء.

١٠- وأخيرا أزيلو جميع اشرطة التيب والحمايه و أعيدوا كل المقابض او القطع لمكانها الصحيح وأستمتعوا بالنتيجه.

نهاية، إستمتعت بالنتيجه الى درجه اني كل ما مريت عندها لازم اتأملها هههههههه و تشجعت وطليت أكثر من قطعه في البيت ، وصار عندي افكار لإعادة تدوير بعض الاثاث هههههههه . أتمنى تكون التدوينه مفيده لكم واتمنى تشاركوها وتنشروها لأي احد تعرفونه يحب التغيير والتجديد في منزله ومو عارف كيف ?

ادعموني بالضغط على ايقونات التواصل الاجتماعي الموجوده اسفل التدوينه ، او بنشرها وشكرا لكم